Асад режимі құлағаннан кейін Израиль Голан жоталарындағы буферлік аймақты өз бақылауына алды

Израиль премьер-министрі Биньямин Нетаньяху Израиль армиясының Голан жоталарындағы қарусыздандырылған буферлік аймақты уақытша бақылауға алғанын жариялады.

Беньямин Нетаньяху Израиль Қорғаныс күштеріне буферлік аймаққа және Голан жоталарының Израиль басып алған бөлігінен "жақын маңдағы командалық позицияларға" кіруге бұйрық бергенін мәлімдеді.

"Біз ешқандай дұшпан күштерінің біздің шекарамызда орналасуына жол бермейміз", - деді ол.

400 шаршы километр аумақты алып жатқан буферлік аймақ 1974 жылғы Күштерді бөлу туралы келісімге сәйкес құрылған және оны БҰҰ күштері бақылайды. Израиль 1967 жылғы алты күндік соғыстың соңғы кезеңінде Сириядан Голанды басып алып, 1981 жылы біржақты тәртіпте аннексиялады. Бұл қадам халықаралық деңгейде мойындалмады, дегенмен АҚШ мұны 2019 жылы біржақты түрде іске асырды.

Израиль шенеуніктері дүйсенбіде Сирияның заманауи қару-жарақ қорларына әуе шабуылдарын күшейтетінін және Асадтың биліктен кетуінен туындауы мүмкін қауіп-қатердің алдын алу үшін жердегі шектеулі әскер санын сақтайтынын мәлімдеді.

Айта кетейік, қазір қазақстандық бітімгерлер Голан жоталарында қызмет атқарып жатыр. Олар Голан жоталарына осы жылдың наурыз айында аттанған.

Бүгін, 9 желтоқсанда Қорғаныс министрлігі қазақстандық бітімгерлерге қатысты мәлімдеме жасады.

"Миссияның жеке құрамы мандатқа сәйкес өз функцияларын орындауда. БҰҰ күштерінің ажырасуды бақылау жөніндегі уәкілетті тұлғалары сириялық және израильдік тараптардың өкілдерімен тұрақты байланыста.

Бітімгерлердің қауіпсіздігін қамтамасыз ету мақсатында қажетті шаралар қабылданып жатыр", - деп мәлімдеді Қорғаныс министрлігі өкілдері.