Қателесіп тастаған: Оңтүстік Кореяда абайсызда түскен бомба салдарынан зардап шеккендер саны 15-ке жетті

Оңтүстік Кореяда абайсызда түскен бомба салдарынан зардап шеккендер саны 15 адамға жетті, деп хабарлайды NBC News арнасына сілтеме жасаған KAZ.NUR.KZ.

Басылымның мәліметінше, Оңтүстік Кореяда оқу-жаттығу кезінде жойғыш ұшақ қателесіп, ауылға сегіз бомба тастап, салдарынан кем дегенде 15 адам зардап шеккен.

"Зардап шеккен 15 адамның екеуі яғни, бейбіт тұрғындар ауыр жараланған. Алайда жарақаттары өміріне қауіп төндірмейді. Жеңіл жарақат алғандар арасында әскерилерге арналған кішкентай шіркеуде болған екі сарбаз, сондай-ақ екі шетел азаматы бар", - деп жазады басылым өрт сөндірушілерге сілтеме жасап.

Жауапты тұлғалардың мәліметінше, сегіз ғимаратқа, соның ішінде шіркеу, бес үй, бір қойма және бір жылыжайға зақым келген. Оқиға орнынан түсірілген фотолардан зақым келген шіркеуді, терезелері сынған тұрғын үйлерді байқауға болады.

Жарылмаған бомбаларды тапқанша, тұрғындар қауіпсіз жерге көшірілген.

Пхочхон қаласының мэрі Бэк Ен Хен барлық әскери оқу-жаттығуды толығымен тоқтатуға шақырып, бұл оқиғаны "сұмдық апат" деп атаған.

Сеулдегі Корей ұлттық стратегиялық ғылыми-зерттеу институтының аға әскери сарапшысы Мун Сон Муктың айтуынша, бұл жағдайдың себебі әлі белгісіз.

"Нақты себебін анықтау үшін біраз уақыт қажет, бірақ оның себептерін талдап, алдын алу шараларын қолға алу маңызды", - деді ол NBC News арнасына берген сұқбатында.

Естеріңізге сала кетейік, бұған дейін BBC-дің Орыс қызметі Оңтүстік Кореяның жойғыш ұшағы оқу-жаттығу жиыны кезінде КХДР шекарасына жақын орналасқан Пхочхон қаласының маңдағы ауылға байқаусызда сегіз бомба тастап, кем дегенде жеті адам зардап шеккенін хабарлаған еді.

Әскерилер дереу мәлімдеп жасап, бұл жайттың болғанына қатты өкінетінін айтып, зардап шеккендердің тезірек сауығып кетуін тілеген.

Қазіргі уақытта оқиғаның мән-жайын анықтау үшін арнайы комиссия құрылған, ал зардап шеккендерге барлық қажетті көмек көрсетіліп, келген шығын көлемі өтелмек.