Түрік әуе компаниясы Қазақстан аспанында болған жайттан кейін жолаушыларға пауэрбанк алып жүруге тыйым салды

Түркияның Pegasus әуе компаниясы Стамбұл – Сеул бағытындағы ұшақта болған оқиғадан кейін пауэрбанктерді қол жүгінде алып жүруге тыйым салды, деп хабарлайды NTV арнасына сілтеме жасаған KAZ.NUR.KZ.

"Портативті қуаттағыштың орындықтар арасына құлап кетуіне байланысты Стамбұлдан Сеулге баратын ұшақтың Қазақстаннан кері қайтарылуы осындай құрылғыларды ұшақта қолдану мәселесін тағы да күн тәртібіне қойды", - делінген мақалада.

Басылымның хабарлауынша, оқиғадан кейін Түркияның көлік және инфрақұрылым министрі Абдулкадир Уралоғлы әуе компанияларына осындай қауіптің алдын алу үшін рейстерде сыртқы аккумуляторларды пайдалануға тыйым салу туралы кеңес берілгенін хабарлады.

Министрдің мәлімдемесінен кейін Pegasus Airlines қол жүгінде пауэрбанк алып жүруге тыйым салатынын хабарлады.

"Тыйым аясында жолаушыларға ұшу кезінде өздерімен бірге алып алған портативті қуаттағыштарды пайдалануға тыйым салынады", - деп хабарлайды телеарна.

Осыған ұқсас шешімді бұрын Turkish Airlines қабылдаған еді, бірақ компания пауэрбанктерге емес, "ақылды" шабадандарға тыйым салды.

"Литий батареялы "ақылды" шабаданды қол жүгінде немесе жүксалғышта тасымалдауға болмайды", - деп мәлімдеді әуе тасымалдаушысы.

Еске сала кетейік, шілде айының соңында жолаушының пауэрбанкі құлап кетуіне байланысты Түркиядан Оңтүстік Кореяға ұшқан ұшақ Қазақстан аспанынан кері бұрылған болатын.

"Құрылғыны ала алмаған жолаушы жағдайды кезекші бортсерікке хабарлаған. Алайда бортсеріктер де портативті зарядтағышты ала алмаған. Осыдан кейін ұшақ командирі сыртқы батареяға қатысты келеңсіз оқиғаның алдын алу үшін Стамбұлға оралуды ұйғарды", - деп жазады басылым.

Мәтіннен қате тапсаңыз, бізге жазыңыз