Қырғызстанның бұрынғы президенті Атамбаевтың ұлы қамауға алынды

Қырғызстанда елдің бұрынғы президенті Алмазбек Атамбаевтың ұлы Қадырбек Атамбаев және экс-депутаттар қамауға алынды, деп хабарлайды 24.kg сайтына сілтеме жасаған KAZ.NUR.KZ.

Басылымның жазуынша, ұсталғандардың үстінен жаппай тәртіпсіздікке қатысты қылмыстық іс қозғалған.

Соттың шешімімен қамауға алынғандар арасында "Социал-демократиялық" партиясының жетекшісі Темірлан Сұлтанбеков, оның жақтасы Қадырбек Атамбаев, экс-депутататтар Шайлообек Атазов, Кубанычбек Қадыров, "Социал-демократ" партиясының мүшесі Эрмек Ерматов, кәсіпкер Урмат Барықтабасов (Асқарбеков) бар.

Олар 2026 жылғы 17 қаңтарға дейін тергеу изоляторында қамауда отырады.

Кейінірек Қадырбек Атамбаев өзіне қатысты іс анағұрлым ауыр қылмыс санатына ауыстырылғанын хабарлады. Оған билікті күшпен құлатуға әрекеттенді деген айып тағылған.

Естеріңізге сала кетейік, бұған дейін Қырғызстанның Ішкі істер министрлігі Жогорку Кенеш сайлауынан кейін жаппай тәртіпсіздіктер ұйымдастырмақ болды деген күдікпен деструктивті топ мүшелерінің ұсталғаны туралы хабарлаған еді.

Тергеу нұсқасына сәйкес, топтың құрамына саяси қайраткерлер, бұрынғы депутаттар, бұрынғы мемлекеттік қызметшілер және қауіпсіздік күштерінің қызметкерлері кірген. Олар өз жақтастарын, соның ішінде ұйымдасқан қылмыстық топтар мен спорт қауымдастықтарын арандатушылық пен қақтығыс тудыру үшін тартқан.

"Ұсталғандар сайлау нәтижелері жарияланғаннан кейін елдің оңтүстігінен бастап, Бішкек пен облыстарда жаппай наразылықты білдіретін бірқатар митинг өткізуді жоспарлаған.

Олардың жоспарында Конституцияға қарсы үндеулер болған, сондай-ақ әкімшілік ғимараттарды, телеарналарды, қауіпсіздік күштерінің нысандарын, қару-жарақ пен пенитенциарлық жүйенің мекемелерін басып алу да кіруі мүмкін", - делінген Қырғызстанның Ішкі істер министрлігі таратқан хабарламада.

Мәтіннен қате тапсаңыз, бізге жазыңыз