Солтүстіктен қыз алған шымкенттік жігіт отбасының қалай ойран болғанын айтып берді

Солтүстіктің қызына үйленген шымкенттік жігіт бір жылдан соң жарымен ажырасып тынған. Әйелінен әбден көңілі қалған азамат KAZ.NUR.KZ тілшісіне шаңырағының қалай шайқалғанын айтып берді.

25 жастағы жігіт бүгінде елордадағы құрылыс компанияларының бірінде жұмыс істейді.

Оқуын аяқтаған соң солтүстіктің қызымен танысқан ол кейін оған үйленемін деп шешім қабылдайды.

Алайда ерлі-зайыптылардың отбасылық өмірі ұзаққа бармай, олар небары бір жылдан кейін ажырасып кеткен.

Ер адам отбасының ойран болуының басты себебі – менталитеттің әр түрлілігі дейді.

"Астанаға оқуға түсіп, осында бітірген соң бірден жұмысқа тұрдым. Ата-анам Шымкентте, өзім де қаланың өзінде туып-өскенмін. Айжанмен (ред. аты-жөні өзгертілді) оқу бітірген жылы таныстым.

Бір жылдай жүріп, кейін үйленетін болып шештік. Солтүстіктің қызы болғанымен, ол біз жақтағы салт-дәстүрдің бәрінен хабардар болған.

"Салт-дәстүрді ұстанамын, орамал тағып, сәлем саламын" деген ол үйленгеннен кейін осы сөздерінен айнып шыға келді. Ата-анам бізге келген сайын, олардың алдында орамал тағып жүру дегенді білмеді, шымқалаға бара қалсақ, үлкендерге сәлем салмайтын болды.

Одан қалса, қабақ шытып, мінезін көрсететінді шығарды. Қысқасы дәм-тұзымыз жараспады, екі жыл бұрын жолымыз екі айырылды", - дейді азамат.

Сөз соңында ол үйлену туралы шешімді асықпай қабылдап, барынша өзіңді түсінетін, туып-өскен жеріңнің менталитетіне жақын жерден қыз алған дұрыс деп кеңесін айтты.

"Отбасылық өмірде менталитетке көп нәрсе байланысты болады екен. Сондықтан, жігіттерге айтар кеңесім: жаныңызға жақын, сізді түсініп, сізбен бірдей ойлайын қызға үйленіңіздер. Жалпы отбасын құру мәселесіне асықпау керек. Себебі үйлену оңай болғанымен, үй болу қиын", - дейді жігіт.