"Арыс. Біз біргеміз": Отандық жұлдыздар Шымкентке ат басын тіреді (фото, видео)

Арыстағы төтенше жағдай барша қазақстандықтарды біріктірді. Еліміздің азаматтары қайғылы оқиғаға тап болған арыстықтарға барынша қолдау көрсетіп, көмек қолын созып жатыр. Олардың арасында отандық шоу-бизнес жұлдыздары да бар. Өнер иелері эвакуацияланған тұрғындардың қал-жағдайын білу үшін Шымкент қаласына бірінен кейін бірі ағылып келуде деп жазады KAZ.NUR.KZ.

Арыстықтармен жеке кездесуге Алтынбек Қоразбаев, Майра Ильясова, Нұрлан Албан, Мөлдір Әуелбекова, Алмас Алтынбеков, Асхат Садырбай, Сәкен Майғазиев, Бағлан Әбдірайымов, Жанболат пен Жазира, "Өнер қырандары" және тағы да басқа әртістер келген.

Олар ауыр жағдайға тап болған халыққа барынша көмектесуге келгенін жеткізді.

Айта кетерлігі, өнер иелерінің барлығы қайғылы жағдайға байланысты "Арыс Біз біргеміз!" деген жазбасы бар арнайы футболка киіп алған.

Facebook желісінде хабарланғандай, шоу-бизнес жұлдыздары Шымкент қаласына мәдениет және спорт министрлігінің тапсырмасымен келген.

Айта кетейік, бұған дейін арыстықтармен қауышып жылаған Мөлдір Әуелбекова туралы жазған болатынбыз.

Оған қоса, Шымкенте арнайы ұшып келген Асхат Садырбай жапа шеккен Арыс жұртына көмектесу үшін базар аралаған.