"Тежеуіш кенеттен істен шыққан": Шымкентте бетон араластырғыш көлік 8 автокөлікті соқты

Шымкентте бетон араластырғыш көлік бағдаршамда тоқтап тұрған 8 автокөлікті соғып, салдарынан түрлі дене жарақатын алған екі адам ауруханаға жеткізілген. Бұл туралы ІІМ Telegram-дағы ресми жаңалықтар арнасында хабарлады.

Ведомство мәліметінше, оқиға 26 шілде күні сағат 10:15 шамасында болған.

Анықталғандай, Самал базарына қарай бағыт алған Howo бетон араластырғыш көлігі Рысқұлов және Қазиев көшелерінің қиылысында бағдаршамда тоқтап тұрған 8 автокөлікті соққан.

Салдарынан әр түрлі дене жарақатын алған Mazda автокөлігінің жүргізшісі мен Toyota Camry көлігінің жолаушысы ауруханаға жеткізілген.

Полиция қызметкерлері оқиғаның мән-жайын нақтылау барысында жүк көлігінің тежеуіші кенеттен істен шыққанын және оны тізгіндеуші азаматтың жүк көлігін басқаруға құқығы жоқ екенін анықтаған.

Көлік жүргізушісіне қатысты Әкімшілік құқықбұзушылық туралы кодекстің 610-бабы 3-бөлігі бойынша хаттама толтырылған.

Мәтіннен қате тапсаңыз, бізге жазыңыз