Оралда басына кірпіш түскен әйел қайтыс болды

26 қарашада, жексенбіде Орал қаласында қайғылы оқиға болып, әйел қаза тапты. Оның басына кірпіш түскен, деп хабарлайды "Мой Город" басылымы.

Орал полиция басқармасы өкілдері журналистерге қайғылы оқиға Назарбаев даңғылында сағат 14:35-те болғанын хабарлаған.

Құқық қорғау органдарының мәліметінше, әйел Назарбаев даңғылындағы №236 үйдің маңынан өтіп бара жатқанда, оның басына кірпіш құлаған. Алған жарақатынан қала тұрғыны оқиға орнында қайтыс болған.

Қазіргі уақытта тергеу-жедел тобы мен жергілікті атқарушы органдардың өкілдері қайғылы оқиғаның себебі мен мән-жайын анықтап жатыр.

Еске салайық, қарашаның ортасында Сәтбаевта бес қабатты ғимараттың карниз бөлшегі әйелдің басына түсіп, жәбірленуші шұғыл түрде ауруханаға жатқызылған еді.

Сондай-ақ Таяуда Тараздың аяғы ауыр әйелдің басына бағдаршам құлағанын хабарлаған едік. Болған оқиғада бағдаршамды соққан көлік жүргізушісі кінәлі болған еді. Оқиға бейнебақылау камерасына түсіп қалған.