Top.Mail.Ru

Сайт нұсқасы

ru kz

Зектілері

"Жүргізушіні ұрып жіберген": Алматы полициясы автобус апатына қатысты оқиғаның жай-жапсарын айтты

Опубликовано:

Автобус адамдарды қағып кеткен жер. Алматы
Автобус адамдарды қағып кеткен жер. Алматы. Фото: NUR.KZ/Юлия Абрамова

Алматы полиция департаментінің өкілдері №7 аурухана маңында болған оқиғаның жай-жапсарын айтты, деп хабарлайды KAZ.NUR.KZ тілшісі.

"Алматы қалалық полиция департаменті бүгін, 2023 жылғы 22 желтоқсанда 18 сағат 15 минутта 47-бағыттағы қоғамдық көліктің (жеке тасымалдаушы - "ДуманТрансКом" ЖШС) жолаушысы жанжал салдарынан жүргізуші әйелді ұрғанын, ол есін жоғалтып, көлікті басқара алмай қалғанын хабарлайды", - делінген хабарда.

Бақылаусыз қалған қоғамдық көлік аялдамада тұрған адамдарды қағып, төрт көлікпен соқтығысқан. Оқиға салдарынан үш адам қаза тауып, тағы 4 адам дене жарақаттарын алды. Олар ауруханаға жеткізілді.

Қоғамдық көлік жүргізушісін ұрған ер адам ұсталды. Аталған дерек Қылмыстық кодекстің 345-бабы 3-бөлігі бойынша сотқа дейінгі тергеудің бірыңғай тізіліміне тіркелді. Сараптама тағайындалды.

Оқиғаның басқа да мән-жайлары анықталып жатқаны айтылады.

Қалалық денсаулық сақтау басқармасы өкілдері зардап шеккендердің жағдайын айтты.

"Жол-көлік оқиғасы салдарынан 7 адам зардап шекті. Үшеуі жедел медициналық көмек келгенге дейін қаза болды. Үш ересек адам №7 қалалық клиникалық ауруханаға жатқызылды, мидың жабық жарақаты, мидың шайқалуы диагноздары қойылды, бір науқаста сол жақ жамбасы сынған. Төртінші жәбірленуші, 15 жастағы бала №2 балалар қалалық клиникалық ауруханасына жатқызылды, диагнозы: сол аяқ сүйектерінің сынуы. Барлық зардап шеккен адамға қажетті медициналық көмек, оның ішінде психологиялық көмек көрсетіледі", - деліген басқарма хабарында.

Бұған дейін Алматыда №7 аурухана маңында автобус аялдамада тұрған бір топ адамды қағып өткені хабарланған еді. Әлеуметтік желілерде оқиға орнында түсірілген суреттер мен видеолар жарияланып жатыр.

Мақаланың түпнұсқасы: https://kaz.nur.kz/accidents/2052219-zurgizusini-uryp-zibergen-almaty-policiyasy-avtobus-apatyna-qatysty-oqiganyn-zai-zapsaryn-aitty/