Ақтөбе облысында 8 адам қаза болған ірі жол апаты: қылмыстық іс қозғалды

Бүгін, 6 наурызда сағат 08:15 шамасында Ақтөбе-Астрахань тас жолында Мұғалжар ауданы Сағашылы ауылының маңында жол-көлік апаты болып, салдарынан 8 адам көз жұмды. Осы дерек бойынша облыстық прокуратура қылмыстық іс тіркелгенін хабарлады, деп жазады KAZ.NUR.KZ.

"Бұл факт бойынша Қылмыстық кодектің 345-бабының 4-бөлігімен (Көлік құралдарын басқаратын адамдардың жол жүрісі немесе көлік құралдарын пайдалану қағидаларын бұзуы) қылмыстық іс тіркелді.

Іс бойынша процестік прокурор тағайындалды.

Тергеу барысы облыс прокурорының жеке бақылауына алынды", - делінген прокуратура хабарламасында.

Айта кетейік, бүгін Ақтөбе-Астрахань тас жолының 120 шақырымында Lada Largus көлігі Toyota Hilux көлігімен бетпе-бет соқтығысқан.

Алдын ала мәлімет бойынша, жол-көлік апаты салдарынан Lada Largus көлігінің 8 жолаушысы оқиға орнында көз жұмды, қазір олардың кім екені анықталуда.

Облыстық прокуратураның мәліметінше, Toyota Hilux автокөлігінің жүргізушісі мен екі жолаушысы Мұғалжар ауданының орталық аудандық ауруханасына жеткізілді.

Мәтіннен қате тапсаңыз, бізге жазыңыз