Маңғыстау мектебінде оқушылар жаппай уланып қалды

Маңғыстаудағы мектептердің бірінде балалар жаппай уланып қалды. Олардың ата-аналары шағым түсірген. Жағдайға облыстық денсаулық сақтау басқармасы түсініктеме берді, деп хабарлайды Lada.kz.

Бесшоқы ауылындағы (бұрынғы Маңғыстау-5) бірінші сынып оқушысының туыстарының бірі №8 мектепте бірінші ауысымдағы 1-4 сынып оқушылары асханада жаппай уланғандарын айтты.

"Қарындасым сабақтан шаршап қайтып, ұйықтағысы келетінін айтты. Кешке қарай оянған кезде ауырып, дене қызуы 39,2 градусқа дейін көтерілді. Маңғыстау ауылындағы ауруханаға өзіміз апардық", - дейді оқушы қыздың ағасы.

Зардап шеккен 1-сынып оқушысының туыстары Бесшоқы ауылында ауруханаға адам толып, кезек пайда болғанын айтады. Олардың айтуынша, онда 50-ден астам бала бар.

Олар Маңғыстау ауылындағы медициналық мекемеде 35-40 оқушыны көрген. Балаларын Ақтау қаласындағы 26-ықшамауданда орналасқан Маңғыстау облыстық балалар ауруханасына жеткізгендер де бар.

Қазіргі уақытта зардап шеккендер әлі де келіп жатыр.

Облыстық денсаулық сақтау басқармасы 6 қыркүйек күні кешке №8 мектептің 21 оқушысының ата-анасы балаларының іші ауырып, дене қызуы көтеріліп жедел жәрдем шақырғандарын айтты.

Сағат 13:15-те медициналық көмекке 58 бала жүгінген. 26 науқас емханада ем қабылдап жатыр, кәмелетке толмаған 27 бала үйде, 5-уі ауруханада.

Қалыптасқан жағдайдың себебін анықтау үшін Маңғыстау облысы бойынша санитарлық-эпидемиологиялық қадағалау департаментіне хабарлама жіберілді.