Алакөлде демалып жатқан ер адам аяғынан айырылды

Жетісу облысында Алакөлде демалып жатқан ер адам оқыс оқиға салдарынан бір аяғынан айырылды. Жағдайға қатысты облыстық полиция департаменті мен денсаулық сақтау басқармасы түсініктеме берді, деп хабарлайды KAZ.NUR.KZ тілшісі.

Әлеуметтік желіде: "Алакөлде су мотоциклі ер адамды қағып кетті, зардап шегушінің аяғы жұлынды", - деген хабарлама тарады.

Жетісу облыстық полиция департаменті өкілдерінің берген түсіндірмесіне сай, бұл дерек бойынша Алакөл аудандық полициясы тексеру жүргізіп жатыр.

"Сотқа дейінгі тергеп-тексеру Қылмыстық кодекстің 344-бабы (Жол қозғалысы немесе темір жол, әуе, теңіз немесе өзен көлігін пайдалану қауіпсіздігі ережелерін бұзу) бойынша жүргізілуде. Қылмыстық іс аудандық полиция басқармасы басшылығының қатаң бақылауында", - деді ведомство өкілдері.

Жетісу облыстық денсаулық сақтау басқармасының мәліметінше, 30 шілде күні сағат 16:10-да Алакөл аудандық орталық ауруханасына 1984 жылы туған науқас түскен. Диагнозы: санның ампутациясы, сол жақ сан сүйегінің, тізе буынының ашық көпбөлікті сынуы, 3-4 дәрежелі травматикалық шок, ауыр геморрагиялық шок.

Оның сол жақ аяғының төменгі бөлігі ампутацияланған. Науқастың жағдайы өте ауыр, жасанды тыныс алу аппаратында жатыр.

Мәтіннен қате тапсаңыз, бізге жазыңыз