Астанада смартфонын алмақ болған ер адам дәретхана шұңқырына құлап кетті

Астана тұрғыны көшедегі дәретхана тесігіне түсіп кеткен смартфонын алмақ болғанда өзі қоса құлап кетті. Оқиға орнына жедел жәрдем мен құтқарушылар келді. Бұл жөнінде Төтенше жағдайлар департаментіне сілтеме жасаған KAZ.NUR.KZ тілшісі хабарлайды.

Instagram-дағы kris.p.oral парақшасында жарияланған бейнежазбадан Астанада жанармай құю бекетінің жанындағы дәретханаға құлап кеткен ер адамды көруге болады. Экран сыртында сөйлеп тұрған екінші адам оның дәретхана тесігіне смартфонын түсіріп алғанын, соны аламын деп тіпті аяқ киімін шешіп қойғанын айтады.

Бұдан бөлек, бейнежазбадан оқиға орнына құтқарушылар мен жедел жәрдем қызметі келгенін байқауға болады.

Елордалық төтенше жағдайлар департаментінің өкілдері NUR.KZ тілшісіне құтқарушылар бұл шақыртуға 19 қаңтар күні сағат 18:04-те жеткенін хабарлады. Оқиға болған жерге 11 адам мен 2 техника барған.

"Шақыру орнына жеткенде ер адамның көшедегі дәретханаға құлап кеткені анықталды", - деп хабарлады Астана қаласының төтенше жағдайлар департаментінің өкілдері.

Ер адам сыртқа шығарылды.

Мәтіннен қате тапсаңыз, бізге жазыңыз