Шымкентте оқу-жаттығу кезінде жарық-шулы граната жарылып, екі курсант жарақат алды

Шымкентте оқу-жаттығу барысында жарық-шулы граната жарылып, екі курсант жарақат алды. Бұл туралы KAZ.NUR.KZ Шымкент қалалық полиция департаментінің баспасөз қызметіне сілтеме жасап хабарлайды.

Бұл жайтқа қатысты ақпарат Telegram-дағы "Письма Президенту" арнасында жарияланды.

"Кейбір дереккөздер шымкенттік полицейлер Бауыржан Момышұлы атындағы оқу орталығында өтіп жатқан оқу-жаттығу кезінде күтпеген жерден жарық-шулы граната лақтырып жібергенін хабарлады. Салдарынан бес курсант жарақат алған. Олар жедел түрде ауруханаға жеткізілді", - делінген хабарламада.

Көп ұзамай оқиғаға қатысты Шымкент қалалық полиция департаменті өкілдері пікір білдірді.

"Бұл дерек жоспарлы оқу-жаттығу кезінде тіркелді. Оқиғаның мән-жайын анықтау үшін тексеру жұмыстары жүргізіліп жатыр. Қазіргі уақытта екі курсант медициналық мекемеде ем қабылдауда. Олардың жағдайы тұрақты", - деп мәлімдеді полиция өкілдері.

Мәтіннен қате тапсаңыз, бізге жазыңыз