"Көлікпен бұрынғы әйелін әдейі қақты": павлодарлық келіншек қатты соққы салдарынан аяғынан айырылды

Желіде павлодарлық ер адам бұрынғы әйелін көлікпен қасақана қақты деген ақпарат тарады. Әйел ауыр жарақат алған, деп хабарлайды облыстық полиция департаментіне сілтеме жасаған KAZ.NUR.KZ.

Павлодарда 2025 жылы 6 қаңтарда болған оқиға туралы Telegram-дағы Halyqstan арнасы жазды. Әйелдің бұрынғы күйеуі көлік тізгінінде болды деген күдікке ілінді.

"Әйел көліктен түспек болған кезде жүргізуші оны ұстап жібермей қойған. Әйел адам босап шығып, аялдама павильонына қарай жүгірген кезде ер адам көлігімен тура сол бағытқа қарай жүрген. Қатты соққы салдарынан әйел металл конструкцияға қысылып, ауыр жарақат алған", - делінген жазбада.

Оқиға куәгерлері дереу жедел жәрдем шақырған. Telegram-дағы арнаның хабарлауынша, дәрігерлер жәбірленушінің жамбас сүйегі бірнеше жерден сынғанын, жұмсақ тіндері жыртылғанын және айтарлықтай қан жоғалтқанын анықтаған, сонымен қатар әйел бір аяғына ампутация жасатуға мәжбүр болған.

Сондай-ақ желіде соқтығыс болған сәт түсірілген видео жарияланды.

"Бейнежазбадан жүргізуші көлікті әйелге қарай әдейі бағыттап, оны павильонға қарай қысып тастағанын көруге болады", - делінген жазбада.

"Күдікті қамауда отыр. Қылмыстық іс сотқа жіберілді", - деп хабарлады департамент өкілдері.

Мәтіннен қате тапсаңыз, бізге жазыңыз