Тараз қаласындағы ХҚКО-да ер адам қайтыс болды

Тараз қаласындағы Халыққа қызмет көрсету орталығында ер адамның жағдайы кенеттен нашарлап, көз жұмды. Бұл туралы "Азаматтарға арналған үкімет" мемлекеттік корпорациясының баспасөз қызметіне сілтеме жасаған KAZ.NUR.KZ порталы хабарлады.

Баспасөз қызметінің мәліметінше, ер адам ХҚКО-ға сағат 08:30 шамасында келген. Мекеме жұмысы ресми түрде сағат 09:00-де басталғанымен, келушілерге қолайлы жағдай жасау және сыртта күттірмеу үшін ғимаратқа ертерек кіруге рұқсат етілген.

"Сағат 08:40-та өзіне-өзі қызмет көрсету секторында тұрған азаматтың жағдайы кенеттен нашарлады. ХҚКО қызметкерлері дереу әрекет етіп, жедел жәрдем шақырды. Дәрігерлер қажетті медициналық көмек көрсеткенімен, азамат қайтыс болған", - деп хабарлады мемлекеттік корпорация өкілдері.

Оқиға кезінде ғимаратта адам көп болмағаны және ауа температурасы белгіленген талаптарға сай екені атап өтілді.

Оқиғаның мән-жайын құзырлы органдар анықтап жатыр.

"Азаматтарға арналған үкімет" мемлекеттік корпорациясы марқұмның туыстары мен жақындарына қайғырып көңіл айтады", - делінген хабарламада.

Мәтіннен қате тапсаңыз,бізге жазыңыз