"Орындыққа шыққан": Павлодарда сегізінші қабаттан құлаған бала тірі қалды

Павлодарда бала сегізінші қабаттан құлап, аман қалды. Бұл туралы өңірлік Төтенше жағдайлар департаментіне сілтеме жасаған KAZ.NUR.KZ хабарлайды.

Павлодар облыстық төтенше жағдайлар департаментінің баспасөз қызметі тағы бір бала биіктен құлағанын хабарлады. Ведомство мәліметінше, оқиға 9 қыркүйекте сағат 21:00 шамасында Павлодар қаласында тіркелген.

"Кәмелетке толмаған бала көпқабатты үйдің сегізінші қабатындағы пәтердің балконынан құлап кетті. Алдын ала мәлімет бойынша, бала балконда болған. Ол орындыққа шығып, терезеден құлаған", - делінген хабарламада.

Бала тірі қалды, бірақ оның жағдайы ауыр деп бағаланып отыр.

Өңірлік ТЖД дерегінше, жыл басынан бері облыста осындай алты оқиға тіркелді. Оның екеуі балалардың өлімімен аяқталған.

Осыған байланысты құтқарушылар ата-аналарды балаларды ашық терезелер мен балкондарда қараусыз қалдырмауға шақырады.

"Терезе жанына бала шығып кете алатын жиһаздар мен басқа да заттарды қоймаңыздар. Терезелерге сенімді құлыптар, торлар немесе ашылуын шектейтін құрылғылар орнату қажет", - делінген хабарламада.

Мәтіннен қате тапсаңыз,бізге жазыңыз