Жалғыз ұлын өлтіргендердің әлі күнге дейін табылмағанына наразы ана көз жасын тия алмады

Ақтөбелік кәсіпкер Ерхан Тілеуімбетовті өлтіргендер 7 айдан бері табылмай жатыр. Полицейлерден күдерін үзген анасы қылмыскерлерді өз бетімен іздеуге кіріскен деп хабарлайды Керек инфо-ға сілтеме жасаған NUR.KZ.

Ерхан Тілеуімбетов қарбыз сатып тұрған жерінен із-түссіз жоғалып кеткен еді. Марқұмның мәйіті былтыр қыркүйек айында табылған. Бір жарым ай бойы хабар-ошарсыз жоғалып кеткен оны біреулер өлтіріп, қала шетіне тастап кеткен.

Сол күні оның қымбат көлікке мініп кеткені де бейнекамераға түсіп қалған. Алайда арада 7 ай өтсе де, қылмыскерлер табылмай жатыр. Жалғыз ұлынан айрылған Райхан Есенаманова баласының өліміне кінәлілерді өз күшімен іздеуге кірісті.

Әлеуметтік желіге хабарландыру жариялап, қандай да бір ақпарат білгендерге қомақты сыйақы да тағайындап қойыпты.

"7 айдан бері еш хабар жоқ. Күндіз күлкіден, түнде ұйқыдан айрылдым. ІІД –нің есігін тоздырдым. Ондағылар “Қарап жатырмыз. Астанадағы Бас прокуратурада бақылауда тұр”дейді. Кінәлілер жазасын алса екен деймін. Маған басқа ештеңе керек емес. Көлік неге табылмайды? Ақтөбеде бұл қылмысты ашпай отыр. Көрген-білгендер болса, айтар деп сыйақы да тағайындадым", - дейді Райхан Есенаманова.

Облыстық Ішкі істер департаментіндегілер бұл қылмысты әлі аша алмай отырғандарын айтады.

"Бұл қылмыс бойынша қазір тергеу тобы жұмыс істеп жатыр. Тергеу тобының жұмысы әр жеті сайын қадағаланады. Бұл қылмыс әлі ашылған жоқ" ,- дейді облыстық ІІД бастығының бірінші орынбасары Айдар Төкеев

Мәтіннен қате тапсаңыз, бізге жазыңыз