Абай ауылында тағы бір жасөспірімнің зорланғаны анықталды

Түркістан облысының полиция департаменті Абай ауылында тағы бір жасөспірімге зорлық әрекеттер жасалған оқиғаға қатысты мәлімдеме жасады деп хабарлайды NUR.KZ.

Желіде Абай ауылында орын алған тағы бір зорлық әрекетке қатысты ақпарат қызу талқыға түсуде.

Зардап шеккен жасөспірімнің қорғаушысы Айман Омарова 16 жастағы жігітті бірнеше жыл бойы екі ер адам зорлап келгенін айтты. Оның мәлімдеуінше, азаматтар жас жеткіншектен ақша талап еткен.

Қорлыққа шыдамаған жігіт өз-өзіне қол жұмсамақ болыпты. Алайда баласына зорлық әрекеттер жасалғанын білген ата-ана полицияға арыз жазған.

Облыстық полицияның хабарлауынша, оқиға 2015 жылдың 15-ші қыркүйегінде тіркелген. Қазіргі таңда, оған қатысты Қылмыстық кодекстің 121-ші бабы бойынша тергеу жұмыстары жүргізіліп жатыр.

Онымен өңірлік полиция департаментіне қарасты тергеу басқармасы айналысуда.

Полиция сотқа дейінгі тергеу амалдары жайлы мәліметтер жарияланбайтынын жеткізді.

Мәтіннен қате тапсаңыз, бізге жазыңыз