ШҚО соты екі баланы зорлады деген күдіктіні неге ақтап шығарғанын түсіндірді

Шығыс Қазақстан облысында екі баланы зорлады деп айыпталған ер адам ақталып шықты. Мамандандырылған аудандық сот үкімді түсіндіріп берді деп хабарлайды KAZ.NUR.KZ.

ШҚО қылмыстық істер бойынша мамандандырылған ауданаралық сотының баспасөз қызметі кәмелет жасына толмағандарды зорлап, қорлық көрсетті деп айыпталған ер адамның қылмыстық ісіне қатысты ақпаратпен бөлісті.

Соттың дерегінше, осы іс бойынша алқабилердің қатысуымен айыптау үкімі оқылған. Алайда қорғалушы тарап алқабилердің дауысы дұрыс саналмады, олардың басым бөлігі ақтауға дауыс берген деп есептеп шағым түсірген.

"Жаңа сот талқылауы барысында 10 алқаби сот отырысының басынан бастап үкім шыққанға дейін қатысып, айыптаушы тарап та, қорғаушылар да келтірген барлық дәлелдемелерді зерттеді. Шешімді 10 алқаби мен 1 судья қабылдады. Алқабилердің жасырын дауыс беру нәтижесінде сот ер адамды кінәсіз деп есептеп, ақтау үкімін шығарды", - делінген соттың баспасөз хабарламасында.

Ведомство үкімнің заңды күшіне енбегенін атап өтті. Тараптар аппеляциялық шағым түсіре алады.

Еске сала кетсек, 4 жасар өгей қызы мен 9 жасар өгей ұлын зорлап, қинады деп айыпталған азамат 16 жылға сотталған еді. Алайда кейінірек сот істі қайта қарап, сотталушы ақталып шыққаны хабарланған болатын.

Айта кетейік, осыған дейін Байқоңырда 7 жасар қыз баланы зорлаған педофил қолға түскенін жазған едік.

Мәтіннен қате тапсаңыз, бізге жазыңыз