Жұмыс уақытында аңға шыққан қостанайлық шенеуніктің басы дауға қалды

Қостанайда аумақтық инспекциясының басшысы жұмыс уақытында аңға шығып, карантин кезінде дәмханаға барғаны анықталды. Мемлекеттік қызмет істері бойынша кеңес мүшелері шенеунікті қызметінен босату жөнінде ұсыныс енгізді деп хабарлайды Астана телеарнасы.

Сыбайлас жемқорлыққа қарсы іс-қимыл департаментінің өкілі шенеунікке қатысты қылмыстық іс тергеліп жатқанын мәлімдеді. Аумақтық инспекция басшысы жұмыс уақытында өзге облыс аумағына аңға шыққаны анықталып отыр. Оған қоса карантин кезінде тәртіпке бағынбай, дәмхағана барған. Қызметтік көлігін де қызметтен тыс пайдаланғаны анықталыпты.

"2020 жылы қазан айының 26 мен 29 аралығында Арқалық қаласына іс-сапармен барған. Жол шығындарын толық өтеп алған. Алайда қазанның жиырма сегізі, яғни сәрсенбі жұмыс күні ол Қостанай облысынан алыстап Ақмола аумағына аңға шыққан. Сол жерде бір тәуліктен астам болған", - дейді өңірлік СЖҚІҚ департаменті басшысының орынбасар Нұржан Шалов.

Атқамінер Арқалық жаққа аңға емес, іс-сапармен барғанын  айтып ақталды. Бірақ онлайн байланысқа шыққан жергілікті инспекция қызметкерлері оның сөзін жоққа шығарды. Ақыры шенеунік аңшы екенін мойындады. Ал басшылық қызметін қашықтан жүргізіп, барлық жұмысты телефон арқылы тындырғанын жеткізді.

Кеңес мүшелері Еңбек кодексін елемеген, карантин талаптарын сақтамаған, мемлекеттік қызмет әдебін ескермеген басшыны қызметінен босатпақшы. Айта кетейік Оразбек Батырбеков облыстық аумақтық инспекцияны 6 жыл бойы басқарып келеді.

"Қазіргі таңда бүкіл әлем пандемияға байланысты қашықтан жұмыс істеп жатыр ғой. Ал кім аңшылықтың жайын түсінетін болса айтайын. Иә,мен аңшымын. Құжаттарым түгел.Негізі аңға шығатын уақыт  таңғы жетіден –сегізге дейін ғана. Ары қарай уақытың босқа өтеді. Сондықтан мен қашықтан жұмыс істедім. Арқалықтағы жұмысымды толық атқардым.Оған фото,видео айғақтарым бар", - дейді өңірлік ветерианрлық бақылау және қадағалау инспекциясының басшысы Оразбек Батырбеков.

Автор: З. Санай

Мәтіннен қате тапсаңыз, бізге жазыңыз