Талдықорғанда 300 миллион теңгеден астам ақша жымқырған шенеунік сотталды

300 млн теңгеден астам қаржыны жымқырды деген күдікке ілінген Талдықорған құрылыс бөлімінің бұрынғы басшысы Саид Дарменовке сот үкімі шықты. Бұл туралы Алматы облысы прокуратурасы ресми сайтында хабарлады.

Қадағалау органы 2021 жылы Талдықорғандағы ЖШС бірінің екі басшысына қатысты үкім шығарылғанын айтты. Олар аса ірі көлемде мемлекет қаражатын иемденгені үшін кінәлі деп танылып, ұзақ мерзімге бас бостандығынан айырылды.

Бұл ретте ақша аудару туралы құжаттарға қол қойған қалалық Құрылыс бөлімінің басшысы Саид Дарменов келтірілген аса ірі көлемдегі залал есепке алынбай, тек лауазымдық өкілеттіктерін асыра пайдаланғаны үшін кінәлі деп танылып, 1 жылға бас бостандығын шектеуге үкім шығарылды.

Ал мемлекетке 300 миллион теңгеден астам шығын келтірілген.

"Облыс прокуратурасының бастамасымен Бас прокурор Жоғарғы Сотқа кассациялық наразылық енгізіп, ол толық көлемде қанағаттандырылды және Дарменовке қатысты бастапқы үкім күшін жойып, қылмыстық іс облыстық соттың жаңа қарауына жолданды", - деп атап өтті ведомствода.

Істі жаңадан қарау кезінде Алматы облыстық соты Дарменовті Қылмыстық кодекстің 28-бабының 5-бөлігі, 189-бөлігі 4-бөлігі, 2-тармағы бойынша кінәлі деп таныған.

Сот оған 7 жылға бас бостандығынан айыру жазасын тағайындады және ол мемлекеттік қызметте жұмыс істеу құқығынан өмір бойына айырылған.

Мәтіннен қате тапсаңыз, бізге жазыңыз