Экология министрлігіне қарасты комитеттің бірқатар шенеунігі ұсталды

Экология және табиғи ресурстар министрлігі Орман шаруашылығы және жануарлар дүниесі комитетінің бірқатар лауазымды тұлғасы ұсталды, деп жазады Сыбайлас жемқорлыққа қарсы іс-қимыл Агенттігінің Telegram-каналы.

Агенттік таратқан ақпаратқа сәйкес, Шымкент қаласының Сыбайлас жемқорлыққа қарсы қызметі Экология және табиғи ресурстар министрлігі Орман шаруашылығы және жануарлар дүниесі комитетінің "Сайрам-Өгем мемлекеттік ұлттық табиғи паркі" бас директорына, оның бірқатар қоластындағы қызметкеріне, сондай-ақ Комитеттің бухгалтерлік есеп және бюджеттік жоспарлау басқармасының басшысына қатысты алдау және сенімге қиянат жасау, пара беру және алу арқылы өзге мүлікті ұрлады деген күдік бойынша сотқа дейінгі тергеу жүргізеді.

Қазіргі уақытта лауазымды тұлғалар ұсталып, уақытша ұстау изоляторына қамауға алынды.

"Тергеу жалғасуда. Тергеу мүддесі үшін өзге ақпарат жария етуге жатпайды", - делінген хабарламада.

Мәтіннен қате тапсаңыз, бізге жазыңыз