Тілін жұтып қоя жаздаған түркістандық жігіт өлім аузынан қалды

Түркістанда көшелердің бірінде ер адамның денсаулығы сыр беріп, тілін жұтып қоя жаздады. Аузынан қан аққан ол жерге құлаған. Мұны қала полицейлері байқап, оны ажалдан арашалап қалған, деп хабарлайды ІІМ ресми Telegram-арнасы.

Басылымның хабарлауынша, учаскелік полиция инспекторлары қызмет атқару кезінде, көше бойында келе жатқан екі жігіттің бірінің жерге құлағанын байқаған.

Бірден оқиға орнына жеткен полицейлер жігіттің тілін жұтып, аузынан қан ағып, денесі қалтырап, талып жатқанын көрген.

Сөйтіп полиция майоры Асқар Мейрамбекұлы жігіттің тілін қолымен бері қарай тартып, полиция подполковнигі Марат Жұмабеков болса денесін уқалап, оның денесінде қан жүгіруін қамтамасыз еткен.

Белгілі болғандай, полицейлер жас жігітке алғашқы көмек көрсетіп, оны дәрігерлерге тапсырған.

Ал тұрғынның досы полицейлерге алғыс айтқан.

Мәтіннен қате тапсаңыз, бізге жазыңыз