Сотталушының түрмеде соққыға жығылуы: ҚАЖД басшылығы қызметтен шеттетіліп, 11 қызметкер жұмыстан босатылады

Әлеуметтік желіде сотталушының дәретхана жуудан бас тартқаны үшін қатты соққыға жығылған сәті түсірілген видео тараған болатын. Ақмола облысындағы колонияда жүргізілген қызметтік тергеудің нәтижесін Қылмыстық-атқару жүйесі комитеті ресми сайтында хабарлады.

"Жүргізілген қызметтік тергеу нәтижелері бойынша Тәртіптік комиссияның шешімімен облыстық Қылмыстық-атқару жүйесі департаментінің бастығы және оның орынбасары, сондай-ақ колония бастығы атқаратын лауазымдарынан шеттетуге ұсынылды. Сонымен қатар, құқық бұзушылыққа қатысы бар 11 қызметкер ІІО-дан теріс себептермен жұмыстан шығаруға ұсынылды", - делінген ведомствоның хабарламасында.

ІІМ Қылмыстық-атқару жүйесі комитеті қазіргі уақытта аталған факті бойынша қызметтік тергеу жүргізіліп жатқанын, оның нәтижесі бойынша тиісті шешім қабылданатынын атап өтті.

Бұл ретте Ақмола облысы прокуратурасының ресми сайтында жарияланған ақпаратқа сәйкес, 3 қыркүйек күні әлеуметтік желіде Атбасар ауданы №1 түзеу мекемесінің қызметкерлері сотталғандарға күш қолданғанының видеосы пайда болған.

"Осы факті бойынша Ақмола облысының прокуратурасы Қылмыстық кодекстің 146-бабы 3-бөлігінің 1-тармағы бойынша сотқа дейінгі тергеп-тексеруді бастады.

Сол күні прокуратура өкілдері бірінші кезектегі жедел-іздестіру іс-шараларын жүргізу үшін аталған мекемеге барды", - делінген хабарламада.

Тиісті сараптамалар тағайындалды.

Ведомство тергеу нәтижелері туралы қосымша хабарланатынын айтты.

Мәтіннен қате тапсаңыз, бізге жазыңыз