Өскеменде зейнеткер әйел көшеде қайтыс болды

Кеше, 15 сәуірде Өскемендегі Славский жағалауында жүрген адамдар ес-түссіз жатқан егде жастағы әйелді байқаған. ШҚО полиция департаменті осы жайтқа қатысты түсініктеме берді, деп хабарлайды YK-news.kz.

Желілік басылымның жазуынша, оқиға куәгерлері алдымен жедел жәрдем шақырған. Дәрігерлер оның қайтыс болып кеткенін хабарлаған. Кейін әйелдің жасы 69-да болғаны анықталды.

Жедел жәрдем қызметкерлері болған жайтты полицияға хабарлаған. ШҚО полиция департаментінің баспасөз қызметі осы жағдайға қатысты түсініктеме берді.

"Сараптамалар тағайындалды. Алдын ала мәлімет бойынша, зейнеткердің жүрегі тоқтап қалған", - деді полиция қызметінің өкілдері.

Бұған дейін Орал қаласының орталығында ер адамның көзге көрінетін жарақаттары бар мәйіті табылғанын жазған едік. Полицейлер бұл факт бойынша қылмыстық іс қозғады.

Мәтіннен қате тапсаңыз, бізге жазыңыз