"Кім ақшаны көбірек лақтырады, сол – жеңімпаз": Астанада жалған ұтыс ойынын ұйымдастырған күдікті ұсталды

Елордада полицейлер алаяқтың қылмыстық схемасын әшкереледі. 17 жастағы жігіт жалған ұтыс ойынын ұйымдастырып, жалпы сомасы жарты млн теңге ақша алған, деп хабарлайды Ішкі істер министрлігінің ақпараттық медиа-порталында.

Полицейлердің мәлімдеуінше, Telegram интернет-ресурсы арқылы ең көп оқырмандары бар танымал арналарды жалға алған. Содан кейін, ұтыс ойынын сылтауратып, хабарламалар жариялап, сипаттаманың астына: "Кім ақшаны көбірек лақтырады, сол – жеңімпаз" деген жарнама орналастырған. Осылайша, басқа біреудің мүлкін иемденуге бағытталған тікелей қылмыстық ниетімен алдау және сенімге кіру арқылы арна абоненттерінен ақша алған. Жалпы шығын сомасы шамамен жарты миллион теңгеге жеткен.

"Жедел-іздестіру іс-шараларын жүргізу кезінде Сарыарқа ауданының криминалдық полиция қызметкерлері күдіктінің жеке басын анықтады. Ол азаматтардан алаяқтық жолмен ақша алған 17 жастағы жасөспірім болып шықты", - делінген ІІМ хабарламасында.

Жігіт өз кінәсін толық мойындады. Алаяқтық фактісі бойынша қылмыстық іс тіркелді. Тергеу барысында күдіктінің осыған ұқсас 7 эпизодқа қатысы бар екені анықталды.

Мәтіннен қате тапсаңыз, бізге жазыңыз