Шымкентте есірткі өткізген күдікті ұсталды

Шымкентте есірткі өткізген 32 жастағы күдікті ұсталды. Бұл туралы KAZ.NUR.KZ Polisia.kz порталына сілтеме жасап хабарлайды.

Көлік полицейлері жедел-іздестіру іс-шараларының нәтижелері бойынша 32 жастағы азаматты ұстаған. Ол Шымкент аумағында 21 грамм марихуана есірткі затын өткізген.

"Тінту кезінде ұсталған марихуана есірткісі, тегіс ұңғылы қару және бірқатар оқ-дәрілер тәркіленді.  Қазіргі уақытта сотқа дейінгі тергеу жүргізілуде.  Өзге ақпарат ҚР ҚПК 201-бабының талаптарына сәйкес тергеу мүддесіне орай жария етілмейді", - делінген полиция хабарламасында.

Еске салайық, Түркістан облысында полиция жыл басынан бері 3,5 мың доза синтетикалық есірткі тәркілегенін жазған едік. Есірткінің заңсыз айналымына қатысты 629 дерек анықталған. Оның 259-ы – қылмыс, 370-і – теріс қылық. Ал есірткі сату бойынша 35, құрамында есірткісі бар өсімдіктерді заңсыз егу бойынша 67, аса ірі көлемде есірткі сақтау бойынша 10 жайт тіркелді.