Алматыда есірткі сатқан Telegram-арналар бұғатталды

Алматыда прокурорлар есірткі тарататын және ломбард қызметін ұсынған Telegram-дағы 16 арнаны жауып тастады. Бұл туралы қадағалау органының сайтына сілтеме жасаған KAZ.NUR.KZ хабарлайды.

Алматы қаласы прокуратурасының ақпаратына сәйкес, бас прокурордың тапсырмасын орындау мақсатында Алматы қаласының прокуратурасы есірткі құралдары мен психотроптық заттар жарнамаланып, таратылған 16 Telegram-арнаны бұғаттады.

Тексеру барысында қатысушыларға тыйым салынған заттарды сатып алу мүмкіндігімен қатар "закладчик" жұмысы ұсынылғаны анықталды.

Нәтижесінде сот Медеу ауданы прокурорының тыйым салынған ресурстарды бұғаттау туралы талабын қанағаттандырды, олардың қызметі тоқтатылды.

"Кінәлі тұлғаларды белгіленген жауапкершілікке тарту мақсатында қадағалау органы Қылмыстық кодекстің 299-1-бабы 1-бөлігі (есірткі, психотроптық заттарды немесе сол тектестерді, прекурсорларды насихаттау немесе заңсыз жарнамалау) бойынша сотқа дейінгі тергеп-тексеруді бастап, одан әрі тергеу үшін полицияға жолдады", - делінген хабарламада.

Алматы қаласының прокуратурасы жедел бұғаттау үшін азаматтарды ұқсас интернет-ресурстар анықталған жағдайлар туралы хабарлауға шақырды.

Мәтіннен қате тапсаңыз, бізге жазыңыз