Түркістан облысында Ұлттық ұлан сарбаздары үш жасар қыздың өмірін сақтап қалды

Түркістан облысында ІІМ Ұлттық ұлан 6506 әскери бөлімінің әскери қызметшілері ұстамасы басталған 3 жасар қыздың өмірін сақтап қалды. Бұл туралы Polisia.kz хабарлайды.

Басылым мәліметіне сүйенсек, оқиға 1 қараша күні сағат 14.00 шамасында Құдайбергенов көшесіндегі дүкендердің бірінде болған. Volkswagen көлігінен қолында кішкентай қыз бар ер адам жүгіріп шығып, өтіп бара жатқан адамдардан көмек сұраған.

Бұл жағдайды байқаған әскери қызметшілер ойланбастан көмекке ұмтылады. Қатардағы жауынгер Нұрболат Сейсенбеков жағдайды бағалап, дереу алғашқы медициналық көмек көрсетуге кіріседі. Осы уақытта сержант Жанболат Дүйсенбай жедел жәрдем шақырады.

Ал уақытылы көрсетілген алғашқы медициналық көмек жедел жәрдем келгенге дейін қыздың жағдайын тұрақтандыруға мүмкіндік берген. Әскери қызметшілердің кәсібилігі мен табандылығы баланың жағдайын тұрақтандыруда шешуші рөл атқарған.

"Біз әрқашан мұқтаж адамдарға көмектесуге дайынбыз. Бұл біздің жұмысымыз және жауапкершілігіміз", - деп атап өтті қатардағы жауынгер Нұрболат Сейсенбеков.

Қыздың отбасы әскери қызметшілерге жедел әрекеттері мен кәсібилігі үшін алғысын білдірді. Қазір балақайдың жағдайы тұрақты.

Мәтіннен қате тапсаңыз, бізге жазыңыз