"Шығын – 437 млн теңге": Түркістан облысында жер қойнауын заңсыз пайдаланған күдіктілер ұсталды (видео)

Түркістан облысында полицейлер қиыршық тасты заңсыз өндірумен айналысқан топты анықтады. Олар мемлекетке 437 млн теңге көлемінде шығын келтірген. Бұл туралы ІІМ-нің ақпараттық медиа-порталына сілтеме жасаған KAZ.NUR.KZ хабарлайды.

Полицейлер Түркістан облысы Келес ауданы аумағында жүргізілген жедел-іздестіру іс-шаралары нәтижесінде заңсыз жер қойнауын пайдаланумен айналысқан адамдар тобының әрекетін тоқтатты.

Түркістан облысы полиция департаментінің ұйымдасқан қылмысқа қарсы күрес басқармасының қызметкерлері пайдалы қазбаларды (қиыршық тасты) өз бетінше сатқан 4 күдіктіні ұстады. Келтірілген залал 437 миллион теңге болған.

Тәртіп сақшылары тінту кезінде күдіктілерден 1 экскаватор, 1 жүк тиегіш, 4 жүк көлігі және басқа да заттай дәлелдемелерді тауып, тәркілеген.

ІІМ мәліметінше, қазіргі уақытта осы факт бойынша қылмыстық іс қозғалды және болған оқиғаның мән-жайын анықтау бойынша жедел-тергеу іс-шаралары жүргізіліп жатыр.