Атырау облысында ер адамға қасқыр шапты (видео)

Атырау облысында шаруа қожалығының жұмысшысына қасқыр шауып, қолын жарақаттаған, деп хабарлайды Kazinform.

Басылым мәліметінше, оқиға 19 желтоқсанда Индер ауданындағы Елтай ауылы маңындағы Көктөбе қыстағында болған. Мұнда шаруа қожалықтың малшылары қоныстанған.

Жергілікті ветеринар Амантай Мұқатовтың айтуынша, малға шөп салу үшін аулаға кірген уақытта қожалық жұмысшысына қасқыр шапқан.

"Қасқыр оның қолын тістеп алған. Тісінің ізі бар. Ол қасқырмен алысқан сәтте інісі дереу жеткен. Екеуі қасқырды ұрып өлтірген", - дейді ветеринар.

Маман қасқырдың басы облыстық ветеринарлық зертхана тапсырылғанын, ал өлексесі санитарлық талапқа сай өртеліп, кейін көмілгенін мәлімдеді.

Қожалық жұмысшысы қазір аудан орталығы – Индербор кентіндегі ауруханада емделіп жатыр.

Жергілікті тұрғындардың айтуынша, дәл осыған ұқсас оқиға екі-үш күн бұрын Ынтымақ ауылында да болған.