Шымкентте Telegram арқылы есірткі заттарын сатқандар 10 жылға сотталды

Шымкентте Telegram арқылы есірткі заттарын сатқандар 10 жылға сотталды. Бұл туралы Otyrar.kz Telegram-дағы арнасында хабарлайды.

Басылым мәліметіне сүйенсек, сот екі азаматты аса ірі мөлшерде психотроптық заттарды заңсыз сатып алғаны, сақтағаны және тасымалдағаны үшін кінәлі деп тапқан.

Сотталушылар 2024 жылдың ақпанында бейтаныс тұлғамен Telegram арқылы мефедрон сату туралы келісім жасаған. Олар "Қайтпас-1" ықшамауданында есірткі сату кезінде ұсталған.

Сотталушылардан 9,475 грамм есірткі заты тәркіленді. Айыпталушылардың кінәсі тінту хаттамалары, мойындау айғақтары, куәгерлердің айғақтары мен сараптамалары арқылы расталды.

Сот олардың әрқайсысын 10 жылға соттады. Үкім заңды күшіне енді.