Алматыда екі блогер мен кәсіпкер адам бопсалады деген күдікпен ұсталды (видео)

Алматы полиция департаментінің қызметкерлері жәбірленушінің арызы бойынша кәсіпкер мен екі блогерді ұстады. Олар әлеуметтік желіге жәбірленушіге қатысты компромат жариялаймыз деп 8 млн теңге бопсалаған деген күдікке ілінді, деп хабарлайды KAZ.NUR.KZ қалалық ПД баспасөз қызметіне сілтеме жасап.

Алматы қаласы полиция департаментінің Instagram-дағы парақшасында күдіктілерді ұстау сәтінде түсірілген видео жарияланды.

ПД баспасөз қызметінің мәліметінше, блогерлер әлеуметтік желілерде компроматтар жариялаймыз деп қоқан-лоққы көрсету арқылы 8 млн теңге бопсалаған. Сондай-ақ олар жәбірленушіні сот шешімімен кәсіпкер төлеуге міндетті болған 20 млн теңгені талап етуден бас тартуға көндірмек болған.

"Күдіктілер 10 млн теңге алып жатқан жерінде ұсталды. Қазақстан Республикасы Қылмыстық-процесстік кодекстің 128-бабына сәйкес, олар уақытша ұстау изоляторына қамалды", - делінген хабарламада.

Бопсалау дерегі бойынша қылмыстық іс қозғалған.