Ота 4 сағаттан астам уақытқа созылды: дәрігерлер Шымкент әкімі орынбасарының жағдайы туралы айтты

Дәрігерлер кеше қастандық жасалған Шымкент қаласы әкімінің орынбасары Руслан Берденовтің жағдайы туралы айтты, деп хабарлайды Otyrar.kz сайтына сілтеме жасаған KAZ.NUR.KZ.

Белгілі болғандай, Берденов ауыр жағдайда ауруханаға түскен. Оған 4 сағаттан астам уақытқа созылған шұғыл ота жасалды.

Қазіргі уақытта өміріне қауіп төніп тұрған жоқ.

"Отадан кейінгі диагноз: оң жақтағы кеуде қуысы тұсына тиген оқ жарақаты, оң жақ өкпенің төменгі бөлігінің, қабырға аралық артериялардың және диафрагманың көптеген жарақаты; оң жақ тұсындағы гемопневмоторакс.

Сондай-ақ бауырдың зақымдануы, құрсақ қуысының көптеген жарақаты, ішкі қан кетулер, оң жақ бүйрек, иық және білек аймағындағы көптеген оқ жарақаты, сыртқы қан кетулер диагнозы қойылды. Плевропульмональдық және геморрагиялық шок алған", - делінген хабарламада.

Қазіргі уақытта Берденовтің жағдайы тұрақты, бірақ ауыр деп бағаланып отыр. Ол дәрігерлердің бақылауында және барлық қажетті медициналық көмек көрсетіліп жатыр.

Мәтіннен қате тапсаңыз,бізге жазыңыз