Алматыда жедел жәрдем көлігіне жол бермеген жүргізуші жауапқа тартылды

Алматыда жедел жәрдем көлігінің алдына түсіп алып, жол бермеген жүргізуші жауапқа тартылды, деп хабарлайды KAZ.NUR.KZ қалалық полиция департаментінің Instagram желісіндегі парақшасына сілтеме жасап.

Алматы полициясының баспасөз қызметінің хабарлауынша, 22 сәуір сағат 15:30-да Трудовая және Әшімов көшелерінің қиылысында жол ережесін бұзу дерегі тіркелді.

Toyota көлігінің жүргізушісі шамы қосылып тұрған жедел жәрдем көлігіне жол бермей, Әкімшілік құқық бұзушылық туралы Кодекстің 598-бабының 1-бөлігінің талаптарын бұзған.

"Жергілікті полиция қызметінің қызметкерлері әйелді әкімшілік жауапкершілікке тартты. Оған қатысты алдын алу, түсіндіру жұмыстары жүргізілді", - делінген хабарламада.

Алматы қалалық полициясы жедел тапсырмаларды орындайтын көліктерге қатысты жүргізу тәртібін сақтау тек заң талабы ғана емес, адам өмірінің мәселесі екенін ескертеді.