Астанада балабақшаның бейнебақылау камерасына түсіп қалған жағдайға қатысты қылмыстық іс қозғалды

Елордалық балабақшалардың бірінде бүлдіршінді ұру дерегі бойынша қылмыстық іс қозғалды. Тәрбиешінің көмекшісі жұмыстан босатылды, деп хабарлайды KAZ.NUR.KZ.

Бұған дейін Telegram-дағы Egov.Press арнасында мекеме қызметкерінің балаларға қатысты физикалық күш қолданғалы түсірідген кадрлар жарияланды.

Автордың сөзінше, ата-аналар мұндай жағдай бұл балабақшада жиі болатынын айтқан.

Оқиғаға қатысты Астана қаласы Білім басқармасының баспасөз қызметі түсінік берді.

"Мектепке дейінгі ұйым әкімшілігі оқиғаға қатысты барлық қажетті шараны қабылдады. Тәрбиеші көмекшісінің балаға күш қолданғаны бақылау камерасындағы бейнежазба арқылы расталып отыр", - делінген хабарламада.

Қазіргі уақытта тәрбиешінің көмекшісі тәртіптік жазаға тартылып, қызметінен босатылды, деп атап өтті ведомство өкілдері.

Материалдар полиция департаментіне жіберілді. Аталған фактіге қатысты қылмыстық іс бойынша тергеу амалдары жүргізіліп жатыр.

Астаналық полиция департаментінің баспасөз қызметі NUR.KZ тілшісіне Алматы аудандық полиция басқармасы балабақшалардың бірінде бүлдіршіннің соққыға жығу дерегі бойынша қылмыстық іс қозғағанын хабарлады.

"Тергеу амалдары жүріп жатыр, мекеме қызметкерлері, ата-аналар мен куәгерлерден жауап алынуда. Сонымен бірге бұл факті бойынша кінәлілерге шара қолдану үшін Астана қаласының Білім сапасын қамтамасыз ету басқармасына ұсыныс жолданады", - деп хабарлады ведомстводағылар.

Ескерту: видеода зорлық-зомбылық көрінісі бар!

Мәтіннен қате тапсаңыз, бізге жазыңыз