Бейімбет Майлин ескерткішіне шығып алып фотосессия жасаған астаналық бойжеткен жауапқа тартылды

Астанада полиция Бейімбет Майлин ескерткішіне шығып алып фотосессия жасаған қыздың кім екенін анықтады. Видео әлеуметтік желіде қызу талқыланған, деп хабарлайды KAZ.NUR.KZ қалалық полиция департаментіне сілтеме жасап.

Астанадағы Қаламгерлер аллеясында түсірілген видео әлеуметтік желі қолданушыларының талқысына түсті. Кадрдан бойжеткеннің жазушы Бейімбет Майлин ескерткішінің үстіне шығып, суретке түсіріп жатқанын көруге болады.

Желі қолданушылары бұл әрекетті тарихи тұлғаны қорлау және қоғамдық орынға деген құрметсіздіктің көрінісі деп сынға алды.

Полиция бейнежазбадағы бойжеткен 18 жастағы Астана тұрғыны екенін анықтады. Ол Байқоңыр аудандық полиция басқармасына жеткізілді.

Полиция бойжеткенге ұсақ бұзақылық жасады деген айып тағылғанын хабарлады. Іс материалдары сотқа жолданды.

Құқық қорғау органдарының қызметкерлері ескерткіштер мен мәдени мұра нысандарына қатысты мұндай әрекеттерге жол берілмейтінін еске салды.

Сонымен қатар полиция ескерткіштер мен мәдени орындарға қасақана зиян келтіру вандализм болып саналуы мүмкін екенін және жауапкершілікке, соның ішінде қылмыстық жауапкершілікке әкеп соғуы мүмкін екенін атап өтті.

Мәтіннен қате тапсаңыз, бізге жазыңыз