Тасмағамбетовтің тұсында Алматы әкімі аппаратының басшысы болған экс-шенеунікке іздеу жарияланды

Алматы әкімдігінің бұрынғы аппарат басшысы Амантай Дандығұловқа алаяқтық күдігі бойынша іздеу жарияланды, деп хабарлайды KAZ.NUR.KZ Ішкі істер министрлігінің баспасөз қызметіне сілтеме жасап.

Telegram желісіндегі Kozachkov offside арнасында 70 жастағы экс-шенеунік әрі журналист Амантай Дандығұловқа іздеу жарияланғаны туралы ақпарат жарияланды. Ол Иманғали Тасмағамбетов қала әкімі болған кезде Алматы әкімі аппаратының басшысы қызметін атқарған.

Құқықтық статистика және арнайы есеп порталындағы "Іздеудегі қылмыскерлер" бөлімінде расында да оның іздеуде екені туралы ақпарат жарияланған.

NUR.KZ тілшісі түсініктеме алу үшін Ішкі істер министрлігінің баспасөз қызметіне хабарласты.

"Алматы полиция департаменті алаяқтық фактісі бойынша қылмыстық істі тергеп жатқанын хабарлаймыз. 7 шілдеде осы қылмысқа барды деген күдіктіге іздеу жарияланды", - деп түсіндірді Ішкі істер министрлігі өкілдері.

Тергеу және жедел-іздестіру шараларының мүддесіне байланысты бұдан өзге ақпарат жария етілмейтіні атап өтілді.

Мәтіннен қате тапсаңыз, бізге жазыңыз