Қазақстандағы орман өрті: өртті өшіруге 600-ге жуық адам, 7 тікұшақ, 148 техника жұмылдырылды

Экология және табиғи ресурстар министрлігі мен ТЖМ еліміздің бірнеше өңірінде болып жатқан орман өртіне қатысты мәліметтер ұсынды. Бүгін, 16 шілдедегі кешкі сағат 20:00-дегі жағдай бойынша өртті жүздеген адам сөндіріп жатыр, деп хабарлайды KAZ.NUR.KZ.

"Сағат 20:00-дегі жағдай бойынша өртті жою жұмыстарына 600-ге жуық адам, 148 бірлік жерүсті техникасы және ЭТРМ, ТЖМ, ҰҚК, ҚМ, ІІМ және ЖАО-ның 7 тікұшағы жұмылдырылған.

Әуеден сөндіру жұмыстары барысында 123 рет су төгу жүзеге асырылды, өрт ошағына 157 тонна су жеткізілді", - делінген хабарламада.

Өрт орнына Экология және табиғи ресурстар министрі Ерлан Нысанбаев және Төтенше жағдайлар министрі, генерал-лейтенант Шыңғыс Әрінов келді. Ведомство басшылары жұмылдырылған күштер мен құралдардың жұмысын үйлестіріп жатыр.

Айта кету керек, жағдай Қазақстан Республикасының премьер-министрінің жеке бақылауында. Оқиға орнында барлық тартылған мемлекеттік қызметтер жұмыс істеп жатыр.

Қазіргі уақытта орман өртін толық жою бойынша жұмыстар жалғасып жатыр.

Мәтіннен қате тапсаңыз, бізге жазыңыз