Атырауда 2,5 млн теңге бопсалады деген күдікпен жергілікті тұрғын ұсталды

Атырауда жергілікті тұрғыннан 2,5 млн теңге бопсалады деген күдікпен ер адам ұсталды. Полицейлер тінту кезінде одан 2,2 миллион теңге тәркілеген, деп хабарлайды KAZ.NUR.KZ.

Telegram-дағы "ҚР ІІМ жаңалықтары" арнасында жарияланған мәліметке сүйенсек, Атырау облыстық ПД-ның экстремизмге қарсы іс-қимыл басқармасы жедел-іздестіру іс-шарасы кезінде Индер ауданының 35 жастағы тұрғынын ұстаған.

Ол тағы бір 35 жастағы Атырау тұрғынынан 2,5 млн теңге көлемінде ақша бопсалады деген күдікке ілінген.

"Тінту барысында күдіктіден бопсалау кезінде алынған 2,2 млн теңге табылып, тәркіленді. Қазіргі уақытта аталған дерек бойынша сотқа дейінгі тергеп-тексеру жүргізіліп жатыр", - делінген хабарламада.

Полиция өзге ақпарат Қылмыстық-процестік кодекстің 201-бабына сәйкес жарияланбайтынын мәлім етті.

Мәтіннен қате тапсаңыз, бізге жазыңыз