Жамбыл облысында сегіз жасар қызды зорлаған туысы өмір бойын түрмеде өткізеді

Жамбыл облысында сегіз жасар қызды зорлаған педофил өмір бойына сотталды. Оқиға Сарысу ауданында болған. Қаршадай қызға қастандық жасаған өзінің жақыны болып шыққан. Ол өмірін енді түрмеде өткізеді, деп хабарлайды "Астана" телеарнасы.

Сотталған ер адам Wi-fi кодын сұрау үшін туысының үйіне кірген. Сол сәтте қыздың анасы үлкен ұлы мен қызын ертіп шаруаларымен қалаға шығып кеткен екен. Кіші қызын көзі көрмейтін қарт атасымен қалдырыпты. Сол сәтте үй ішіне енген ер адам 8 жасар қыздың ойнап отырғанын көріп үйде басқа ересектер жоқ екеніне көз жеткізген соң жымысқы ойын жүзеге асырған. Анасы келгенде кызы бар шындықты жайып салған. Осылайша әйел бірден қызының зорланғаны туралы арыз түсірген. Күдіктінің ісі толықтай дәлелденіп, сот отырысы жабық форматта өтті. Енді ол өмірінің соңына дейін темір торда отырады.

"Қазақстан Қылмыстық кодексінің 121-бабы 4-бөлігінің санкциясы тек өмір бойына бас бостандығынан айыру түріндегі жазаны көздейді. Сот үкімімен оған өмір бойына бас бостандығынан айыру түріндегі жаза тағайындалды. Үкім заңды күшіне енген жоқ", - деп пікір білдірді Жамбыл облысы қылмыстық істер жөніндегі ауданаралық сотынің өкілдері.

Мәтіннен қате тапсаңыз,бізге жазыңыз