Алматыда матч кезінде алаңға партия туын ұстап жүгіріп шыққан жанкүйер ұсталды

Полицейлер Алматыда футбол матчы кезінде алаңға партия туын ұстап жүгіріп шыққан жанкүйерді ұстады, деп хабарлайды қалалық ПД-ның баспасөз қызметіне сілтеме жасаған KAZ.NUR.KZ.

Ведомствоның мәліметінше, Орталық стадионда өткен футбол матчы кезінде көрермендердің бірі саяси партияның туын ұстап, ойын алаңына жүгіріп шығып, қоғамдық тәртіпті және бұқаралық іс-шараларды өткізу кезінде сақталуға тиіс қауіпсіздік талаптарын өрескел бұзған.

"Полиция қызметкерлері стадионның қауіпсіздік қызметімен бірлесіп, құқыққа қайшы әрекетті дереу тоқтатты. Құқық бұзушы тікелей ойын алаңында ұсталып, Алматы қаласы Бостандық аудандық полиция басқармасына жеткізілді.

Қазіргі уақытта аталған азаматқа қатысты Қазақстан Республикасы Әкімшілік құқық бұзушылық туралы кодексінің 434-бабы ("Ұсақ бұзақылық") бойынша әкімшілік іс қозғалды. Жиналған материалдар заңды шешім қабылдау үшін сотқа жолданады", - делінген хабарламада.

Алматы қаласының полиция департаменті қоғамдық тәртіпті бұзатын кез келген әрекеттердің, олардың жасалу себептеріне қарамастан, сондай-ақ спорттық іс-шараларды рұқсат етілмеген акцияларды өткізу алаңына айналдыру әрекеттерінің жол берілмейтінін және мұндай құқық бұзушылықтар үшін Қазақстан Республикасының заңнамасына сәйкес жауапкершілік көзделгенін еске салады.

Мәтіннен қате тапсаңыз,бізге жазыңыз