Қазақстандық әйел Ыстықкөлде 14 жастағы қызды соққыға жықты деп күдіктелуде (видео)

Қырғызстан полициясы Ыстықкөл жағажайындағы жанжалдан кейін сотқа дейінгі тексеруді бастады. Қазақстандық әйел пансионаттың 14 жастағы қызметкерін соққыға жықты деп айыпталып отыр, деп хабарлайды KAZ.NUR.KZ.

Ыстықкөл көлінің жағасындағы Бостері ауылының жағажайында Қазақстаннан келген демалушы мен пансионаттың кәмелетке толмаған қызметкерлері арасында жанжал туындады. Әлеуметтік желілерде видеожазбалар жарияланғаннан кейін Қырғызстанның құқық қорғау органдары оқиғаға назар аударды.

Threads әлеуметтік желісіндегі жазба авторының айтуынша, әйел пансионат аумағында жұмыс істеп жүрген 14 жастағы қызды соққыға жыққан. Жасөспірімнің миы шайқалып, мұрны сынған көрінеді. Қыз ауруханаға жатқызылды, қазір ол дәрігерлердің бақылауында.

Тағы бір куәгер оқиғаның өз нұсқасын баяндады. Оның айтуынша, жанжалға турист демалып жатқан орынның маңындағы қоқыс себеп болған.

Куәгердің сөзінше, әйел кәмелетке толмаған қыздардан аумақты тазартуды талап еткен. Қыздар бұл өтінішті орындағанымен, сөз таластыру жанжалға ұласып, демалушы тарапынан агрессия тоқтамаған.

Оқиғаның видеосы тарағаннан кейін Қырғызстан ІІМ Ыстықкөл облыстық ішкі істер басқармасы жағдайға қатысты түсініктеме берді.

"Бұл факт Ыстықкөл аудандық ішкі істер бөлімінің ақпаратты есепке алу журналына тіркеліп, сотқа дейінгі тексеру басталды", - деп хабарлады ведомство өкілдері.

Мәтіннен қате тапсаңыз,бізге жазыңыз