Шымкентте экскаватор басып кеткен жұмысшы жансақтау бөлімінде жатып көз жұмды

Шымкентте айналма жол құрылысы кезінде экскаватор басып кеткен жұмысшы қаза болды. Ауыр жарақат алған 54 жастағы қызметкер бірнеше күн жансақтау бөлімінде жатып жан тапсырған, деп хабарлайды "КТК" телеарнасы.

Қайғылы оқиға 21 шілдеде Шымкент қаласындағы Бәйдібек би мен Төлеметов көшесінің қиылысында болды. Түскі үзіліске шығып бара жатқан Әбдіхан Сүлейменді экскаватордың жүргізушісі абайсызда басып кеткен.

Құрылыс компаниясының екі жұмысшымен де еңбек келісімшарты жасалмаған. Қазір полиция департаменті мен еңбек инспекциясы жанынан арнайы комиссия құрылып, істің мән-жайын анықтауға кірісті.

Бұл дерек бойынша қылмыстық іс қозғалып, тергеу жүргізіліп жатыр.

"Абайсызда адам өліміне әкеп соққан еңбектi қорғау қағидаларын бұзу жайты бойынша полиция қылмыстық іс қозғады. Оқиғаның мән-жайын жан-жақты, толық әрі объективті анықтауға бағытталған тергеу жүргізілуде. Тергеу нәтижелері бойынша қолданыстағы заңнамаға сәйкес процессуалдық шешім қабылданады", - деп пікір білдірді Түркістан облысы ПД баспасөз қызметі.

Мәтіннен қате тапсаңыз,бізге жазыңыз