84 жастағы әжені соққыға жыққан: Алматы тұрғыны тәртіп сақшыларына күдіктіні ұстап берді

Алматыда Төле би мен Саин көшелерінің қиылысында ер адам 84 жастағы қарт әжеге шабуыл жасап, қолындағы сөмкесін жұлып әкеткен. Бұл оқиғаға куә болған алматылық қартқа көмекке келіп, қылмыскерді ұстап, тәртіп сақшыларының қолына тапсырған. Аудандық полиция басқармасы оның әрекетіне алғыс білдіріп, алғыс хат табыстады, деп жазады Polisia.kz.

Алматыда қарт әйелді соққыға жығып, тонап кеткен күдіктіні ұстауға көмектескен 25 жастағы қала тұрғыны марапатталды. Азаматтың қырағылығы мен белсенді азаматтық ұстанымын жоғары бағалаған Әуезов аудандық полиция басқармасының қызметкерлері оған алғыс хат пен естелік сыйлық табыстады.

Оқиға 20 шілдеде кешке Төле би мен Саин көшелерінің қиылысында болған. Тергеу мәліметінше, белгісіз ер адам 84 жастағы әйелге шабуыл жасап, оның бетінен ұрып, ақшасы мен телефоны салынған сөмкесін тартып алып, оқиға орнынан қашып кетуге әрекеттенген.

Оқиғаның куәгері болған Роман бір сәт те ойланбастан, басқа азаматтармен бірге күдіктінің соңынан қуып, полиция қызметкерлері келгенге дейін оны ұстауға көмектескен.

Мәтіннен қате тапсаңыз,бізге жазыңыз