Алматы облысында 18 шенеунік жазаланды: олар инвесторлардың жұмысына кедергі келтірген

Алматы облысында инвесторлардың жұмысына кедергі келтірген 18 шенеунік жазаланды. Олардың ішінде 8 лауазымды тұлға тәртіптік жауапкершілікке тартылған, деп хабарлайды kazinform.

Алматы облыстық прокуратурасы баспасөз қызметінің хабарлауынша, прокурорлық сүйемелдеу аясында бақылау-қадағалау органдары жүргізген 6 заңсыз тексеру мен салынған 3 әкімшілік айыппұлдың күші жойылды. Сонымен қатар инвесторларға 4 жер учаскесі беріліп, электр желілеріне қосылуға 2 техникалық шарттың рәсімделуі қамтамасыз етілді.

Инвесторларға әкімшілік кедергі келтіргені үшін 8 лауазымды тұлға тәртіптік жауапкершілікке, 10 лауазымды тұлға әкімшілік жауаптылыққа тартылды.

Прокуратураның қабылдаған шараларының нәтижесінде 100-ге жуық инвестор Ұлттық цифрлық инвестициялық платформаға енгізілді. Бұл оларға прокурорлық қорғау тетіктерін, оның ішінде "прокурорлық сүзгіні" қолдануға мүмкіндік береді.

"Есепті кезеңде прокуратура инвесторларға қатысты 3 тексеруді, 10 әкімшілік хаттаманы және 11 шектеу сипатындағы шараны келісуден бас тартты. Сонымен қатар мемлекеттік органдар прокурормен келісілмей сотқа берілген 2 талап-арызды кері қайтарып алды", - делінген хабарламада.

Мәтіннен қате тапсаңыз,бізге жазыңыз