Астанада мас күйде көлік ішінен оқ атқан ер адам ұсталды (фото)

Астана тұрғыны мас күйінде көлік ішінде отырып, дабыл тапаншасынан аспанға оқ атты. Сот шешімімен оған 10 тәулікке әкімшілік қамауға алу жазасы тағайындалды, деп хабарлайды полиция департаментіне сілтеме жасаған KAZ.NUR.KZ.

Астанада 29 жастағы ер адам қоғамдық орында дабыл тапаншасынан оқ атқаны үшін жауапқа тартылды. Полицияның мәліметінше, ол көлік салонында отырып, аспанға екі рет оқ атқан.

"Құқық бұзушылық жасаған сәтте ер адам мас күйде болғаны анықталды", - деп хабарлады полиция департаменті.

Қоғамдық орында мас күйінде жүргені үшін құқық бұзушы әкімшілік жауапкершілікке тартылды. Қаруды заңсыз сақтау және алып жүруге қатысты тағы бір әкімшілік іс сотқа жолданды.

"Сот қаулысымен ұсақ бұзақылық жасағаны үшін оған 10 тәулік мерзімге әкімшілік қамауға алу жазасы тағайындалды", - делінген хабарламада.

Полиция қоғамдық тәртіпті бұзатын және қоғам қауіпсіздігіне қатер төндіретін кез келген әрекет заңнамаға сәйкес жауапкершілікке әкеп соғатынын еске салды.

"Қоғамдық тәртіпті бұзатын және азаматтардың қауіпсіздігіне қатер төндіретін кез келген әрекет Қазақстан Республикасының заңнамасына сәйкес жауапкершілікке әкеп соғады", - деп атап өтті ведомство.

Мәтіннен қате тапсаңыз,бізге жазыңыз