Семейде полиция ірі көлемде алаяқтық жасағаны үшін сотталған адамды қолға түсірді

Семейде полиция қызметкерлері алаяқтық үшін сотталып, қаңтардан бері пробациялық бақылаудан қашып жүрген 36 жастағы ер адамды қолға түсірді, деп хабарлайды KAZ.NUR.KZ ІІМ-нің Polisia.kz ақпараттық медиа-порталына сілтеме жасап.

Семейде полиция қызметкерлері пробациялық бақылаудан жалтарғаны үшін іздеуде жүрген 36 жастағы ер адамды ұстады. Бұған дейін сот оны аса ірі көлемде алаяқтық жасағаны үшін кінәлі деп таныған.

ІІМ-нің ведомстволық сайтының мәліметінше, сот үкімі шыққаннан кейін сотталушы пробациялық бақылауда болған. Алайда қаңтарда ол тұрғылықты жерінен өз бетінше кетіп, байланысқа шығуды тоқтатқан, содан кейін оған іздеу жарияланған.

"Іздеуде жүрген азамат ұсталып, Семей қаласының тергеу изоляторына қамалды. Жақын арада ол Павлодарға айдауылмен жеткізіледі", - деді Павлодар облысы полиция департаменті криминалдық полиция басқармасының бастығы Жаслан Танжанов.

Ведомство өкілдері іздеуде жүргендерді табуға аумақтық полиция бөлімшелері мен көршілес өңірлердің қызметкерлері тартылатынын жеткізді. Іздеу жарияланғаннан кейін барлық бөлімшелерге бағдар жолданады.

"Заң бұзған тұлғалар жауапкершіліктен құтыламын деп жасырынуға тырысады. Алайда іздеу жарияланғаннан кейін бағдарлар барлық аумақтық бөлімше мен жақын маңдағы өңірлерге жіберіледі. Әр қызметкер іздеуде жүрген адамдардың сыртқы келбеті мен ерекше белгілері бойынша нұсқау алған", - делінген хабарламада.

Полиция өкілдері сот төрелігінен қашып құтылу мүмкін емес екенін және жасалған қылмыс үшін құқық бұзушы заң алдында міндетті түрде жауап беретінін атап өтті.

Мәтіннен қате тапсаңыз,бізге жазыңыз