Атырау тұрғыны балабақшада баласы қорлық көргенін мәлімдеді

Атырауда бір жасар баланың анасы жекеменшік балабақшада баласына қорлық көрсетілгенін айтып шағымданды. Полиция қылмыстық іс қозғады, деп хабарлайды "Ақ Жайық".

Анасының айтуынша, ол ұлының денесінен тәрбиешілердің әрекетінен пайда болуы мүмкін іздерді байқаған. Басылым тілшісінің хабарлауынша, бейнебақылау камераларынан алынған жазбалар оның күдігін растаған . Әйелдің айтуынша, содан кейін ол полицияға жүгінуге мәжбүр болған.

Атырау облыстық полиция департаменті кәмелетке толмаған баланы тәрбиелеу жөніндегі міндеттерді орындамау бабы бойынша қылмыстық іс қозғалғанын хабарлады.

Тергеу барысында оқиғаға қатысы бар деп танылған барлық тұлға полиция бөліміне жеткізілді. Қазіргі уақытта тергеу амалдары жүргізілуде, өзге мәліметтер жарияланбайды.

Қалалық білім басқармасы аталған балабақшаның жекеменшік екенін және мемлекеттік білім беру тапсырысы бойынша жұмыс істемейтінін мәлім етті.

Мәтіннен қате тапсаңыз,бізге жазыңыз